Янги йилингиз муборак бўлсин, азизлар!

Янги йилингиз муборак бўлсин, азизлар!

Вақт-учқур от. У кўз очиб юмгунча янги йил остoнасида турибди. Умримиздан яна бир йил ўтганини сезмай ҳам қолдик, бир ёшга улғайдик. Сафимизни янги инсонлар тўлдирмоқда. Ва айни бир пайтда кечагина қаторимизда ёнма-ён турган сафардошимиздан мосуво бўлдик. Ҳаёт худди кеча ва кундуздек, гоҳ ёришиб, гоҳ зимиcтонлашиб турибди.

Хўш, учқур давр бир йилда бизга нималар берди? Нималардан огоҳ этди? Нималар         қилишимиз  лозимлигини  ўргатди?

Ўтган йили, энг асосийси, мустақил Ўзбекистоннинг 20 ёшлик тўйини нишонладик. Мамлакатимиз 20 йил ичида мисли кўрилмаган даражада юксалди, камол топди. Элимиз обод бўлди, одамларнинг тафаккури тубдан ўзгарди.

Аслида АҚШда ўзбек тилидаги телевидение ишлаб турганлиги, ўз забонимизда қатор-қатор газета ва журналлар чоп этилаётгалигининг ўзи ҳам истиқлол  шарофатидандир. Биз, Ўзбекистон халқ шоири Абдулла Орипов таъкидлаганидек, ҳовузни дунё деб билган тилла балиқчага ўхшардик. Бугун эса ўзбек фарзандининг дунёнинг турли бурчакларида ишлаётганини, кашфиётлар яратаётганлигини кўрамиз ва ҳайратланамиз. Бу ҳайрат бизни янги-янги чўққилар, бемисл янгиланишлар сари ундамокда.

Бугун ҳар бир инсон ўз ҳаётини сарҳисоб қиладиган даврдир! Шу давр мобайнида журналимиз таваллуд топди, унинг бир-бирига ўхшамаган ва ранг-баранг тўртта сони муштарийлар қўлига тегди. Ўқувчиларимиз сони тобора кўпайиб бормоқда. Унинг ихлосмандлари нафақат Нью-Йоркда, балки АҚШнинг кўплаб штатларида ҳам бор. Улар таҳририятга доимо сим қоқиб туришади.

Янги йилда журналнинг даврийлиги мунтазамлашади. Унинг мазмун ва мундарижаси яхшиланади. Сиз унда мамлакатимиз ва АҚШда бўлаётган энг охирги воқеаларни ўқийсиз, ёзувчи ва шоирларимизнинг ҳаёти ва ижоди билан танишасиз. Унинг сахифаларида саньат ва спорт юлдузлари билан учрашасиз. Хуллас, журналимизнинг янги йил режалари улкан. Энг муҳими, у cизнинг доимий ҳамроҳингиз ва қалин дўстингизга, маслаҳатдошингизга айланади.

Сизни яна бир карра янги йил билан муборакбод этамиз. Янги йил барчамизга олам-олам шодликлар олиб келсин. Мамлакатимиз осмони ҳамиша мусаффо бўлсин!

Элимиз обод, халқимиз форовон турмуш кечирсин. Ана шу фаравонлик бағрида биз, Сизга шириндан-шакар каломларимизни аямайлик! Эсон — омонликда кўришгунча, хайр азизлар!

«UZBEGIM» журнали таҳририяти. 

 

You must be logged in to post a comment Login